Letero 167a

Sen subskribo, al kavaliro Dansnio

Sinjoro,

Mi honore sciigas vin, ke hodiaŭ matene la Reĝaj Juristoj priparolis pri via duelo kun s-ro de Valmono, kaj ke antaŭvideble la Socia Defendantaro plendos kontraŭ vi. Mi opiniis tiun averton utila, por ke viaj protektantoj helpu vin, aŭ, se ne eble, por ke vi foriru al sekura loko.

Se vi permesas konsilon, oni tro multe vidis vin lastajn tagojn ; dum kelka tempo kaŝu vin : kvankam oni ordinare indulgemas al tiaj aferoj, vi tamen devas havi respekteman timon kontraŭ niaj leĝoj.

Tiu singardo iĝas tiom pli necesa, ke iu s-ino de Rozmondo, laŭdire onklino de s-ro de Valmono, intencas plendi kontraŭ vi : tiam la Socia Defendantaro devos akcepti ŝian akuzon. Vi eble devus klarigi al tiu sinjorino vian sintenon en la afero.

Propraj motivoj malhelpas, ke mi subskribu tiun ĉi leteron ; mi tamen esperas, ke vi favore konsideros la senton, kiu inspiris ĝin.

Mi kun honoro estas…

El Parizo, la 10an de Decembro 17**.