Letero 166a

De s-ro Bertrando al s-ino de Rozmondo

Sinjorino,

Laŭ la ordonoj, kiujn mi honore ricevis de vi, mi vizitis Prezidanton de ***, montrante vian leteron kaj dirante, ke mi agos nur laŭ via deziro kaj laŭ lia konsilo. Tiu respektinda juristo petis min rimarkigi al vi, ke la honoron de S-ro via nevo endanĝerigus kaj via plendo kontraŭ kavaliro Danceny, kaj la juĝdecido de la kortumo : tio ja estus granda malfeliĉo. Li sekve opinias, ke vi faru nenian ekpaŝon ; ke male vi malhelpu, ke la Socia Defendantaro ekkonu tiun bedaŭrindan aventuron, kiu jam nun tro malkaŝiĝis.
Tiu diro ŝajnis al mi prudentoplena, kaj mi decidis atendi novan ordonon vian.

Bonvolu, Sinjorino, aldoni al via nova komando mencion pri via farto : mi timas la malbonan efikon de tiom da afliktoj. Mi esperas, ke vi pardonos tiun aŭdacon, konsiderante mian alligemon kaj zorgemon al vi.

Mi estas, kun respekto, Sinjorino, via…

El Parizo, la 10an de Decembro 17**.