Malarmado

La 3-a kunveno de ŝtatoj, kiuj subskribis la Konvencion pri la pafaĵoĵetoj el bomboj, okazis en Oslo (Norvegio) de la 11-a ĝis la 14-a de septembro 2012.
La procezo de Oslo, por malpermesi la pafaĵoĵetojn el bomboj, komenciĝis antaŭ ses jaroj, t.e. en 2006. La celo estas malpermesi armilojn, kiuj blinde frapas eĉ civilulojn, ĉu tuj post la ekfrapo de pafaĵo sur grundo, ĉu longatempe post la militfino funkciante kiel kontraŭpersonaj minoj.
La Konvencio de Oslo, kiu malpermesas iujn pafaĵoĵetojn el bomboj estis subskribita en 2008, kaj validiĝis la 1-a de aŭgusto 2010.
Ĝis nun, 111 landoj subskribis la Konvencion de Oslo, kaj 75 el ili ratifis ĝin.
Nur en la jaro 2011,
– dek subskribintaj ŝtatoj detruis 107 000 stokitajn pafaĵoĵetojn el bomboj (bombojn aŭ kaj obusojn), kiuj entenis 17 600 000 pafaĵojn.
– pli ol 48 000 neeksploditaj pafaĵoj ĵetitaj el bomboj aŭ obusoj estis detruitaj dank’al kampanjoj de grundpurigo.
Laŭ la raporto de C.M.C. (Cluster Munition Coalition) – Monda Koalicio kontraŭ la pafaĵoĵetoj el bomboj - , ĝis nun la subskribintaj landoj detruis 750 000 pafaĵoĵetojn el bomboj (bombojn aŭ obusojn), kiuj entenis 85 800 000 pafaĵojn. Tiu kvanto reprezentas 60 % de deklaritaj stokoj.
La raporto klarigas la Usonan provon kun kelkaj aliaj landoj, kiuj, en novembro 2011, provis almeti novan protokolon, kiu permesintus la uzon de pafaĵoĵetoj el bomboj tre danĝeraj por la civila loĝantaro. Tiu provo fiaskis.
C.M.C. (Cluster Munition Coalition) - Monda Koalicio kontraŭ la pafaĵoĵetoj el bomboj - partoprenis en la kunveno de Oslo. La koalicio kunigas pli ol 350 neregistarajn organizojn el cento da landoj. Pere de enlandaj organizoj, membroj de C.M.C., ĝi intervenas ĉe la registaroj, la publiko, la amaskomunikiloj, … pri ĉiuj punktoj rilate la pafaĵoĵetojn el bomboj, kaj agas por la universaliĝo de la Konvencio de Oslo.
SAT estas, ekde 2006, unu el 350 neregistaraj organizoj de la koalicio C.M.C. Jen ekstrakto de la deklaracio de la 79-a SAT-Kongreso en Beogrado : la 79-a kongreso « subtenas la batalon de C.M.C. : Monda Koalicio kontraŭ la pafaĵoĵetoj el bomboj, kaj deziras, ke SAT eniru en la Koalicion por partopreni en tiu batalo ». Sennaciulo de oktobro 2006 informis la SAT-anojn ke C.M.C. akceptis la aliĝon de SAT al la Koalicio.

Ĉiam pri malarmado : En maja-junia Sennaciulo, ni alvokis subskribi la petskribon « Por Francio, sen nukleaj armiloj ». Denove, ni alvokas ĉiujn pacistojn de SAT, francajn aŭ ne-francajn, subskribi tiun petskribon. Vidi TTT-ejo : www.francesansarmesnucleaires.fr.

Colette Weiss kaj André Weiss (la 16-an de septembro 2012)