El "Ciklo de l’Arĝenta Astro"

En ornato orname orita
ĉe altaro de l’vorto mi staras,
kiel orfo ĉe pordo fermita
de l’morto...
Kaj orgen’ al orelo ordonas
enaŭskulti por ĉiam sonkulton -
orakolon de la Oriono
radia...
Tra la orto al la oriento
kore celas dezire-ribela
oremuso de mia belsento
aspire...
Oro, ornamo, ornato
alternas en alto interna...
Mi - pastro de la nekonato -
staras ĉe ĝia altaro
lumate de l’astro eterna
arĝenta.

El "Ciklo de l’Arĝenta Astro", aperigita en "Prologo" (SAT, Eldona Fako Kooperativa, Leipzig 1929)