La 19an de majo

Kio furoras en Japanio ?
Post la katastrofo homoj ekpensis pri sia ĝisnuna luksa vivmaniero. Nun ili provas uzi pli energiŝparajn aparatojn jene :
– 1. argila kuirpoto (vendiĝas 20% pli multe, foto)
– 2. lavtabulo (10-oble pli multe, foto)
Tre malpuraj vestaĵoj, precipe ŝtrumpetoj, fariĝas tre puraj per tiu tabulo.
– 3. elektra ventumilo (30% pli multe)
Nun multaj uzas klimatizilon, sed tiu bezonas multe da elektro.
– 4. varmobotelo (40% pli multe)
Nun oni uzas elektran varmbotelon, kiu tenas la akvon ĉiam varma. En mia hejmo ni nek uzas simplan varmbotelon, nek elektran. Ni boligas akvon, kiam kaj kiom ni bezonas.
– 5. moskitfumizaĵo (30% pli multe, foto)
Moskitfumizaĵo estas japana inventaĵo. En 1985 estis importita de Usono speco de krizantemo, kiu efikas kontraŭ moskitoj. Komence moskitfumizaĵo estis pulvora, poste bastoneta kaj en 1895 fariĝis spirala. Lastatempe oni ofte uzas elektran moskitfumizaĵon.
– 6. ventotintilo (30% pli multe, foto)
Japanoj havis kutimon pendigi ventotintilon, por sentigi sin pli malvarme en somero.
(laŭ televidprogramo)

Alia surpriza furoro, geedziĝo
Japanaj gejunuloj ne emas geedziĝi, pro kio naskokvanto pli kaj pli malgrandiĝis. La registaro ĉiel provas altigi tiun kvanton sed vane, tamen la katastrofo helpas.
Laŭ O-net, kompanio por la informo-servo pri geedziĝo, 12% pli multe da homoj petis informon en aprilo, ol en la sama monato en 2010. Eksmembriĝo pro geedziĝo inter la membroj multiĝis 19,5% pli en marto kaj 18,1% pli en aprilo. Virino 30-jara en Tokio, kiu nove membriĝis al la geedziĝpera kompanio, diras : “En la vespero de la tertremo mi bezonis 6 horojn por reveni hejmen. Poste mi estis tre nervoza pro oftaj tertremoj. Mi ekhavis maltrankvilon pro mia estonteco, kaj ekkonsideris grave havi familion”. En magazenego Takaŝimaja en Tokio geedziĝaj ringoj vendiĝas 40% pli multe en aprilo, ol en la lasta aprilo. Gejunuloj ekmoviĝas al geedziĝo por certigi sian vivon, spertinte nekredeble grandan katastrofon.
(laŭ la ĵurnalo Asahi la 15an de majo).