Marĵorio Bultono
PROTESTAJ VOĈOJ
Ni nun anoncas kun fiero,
ke grandan bombon ni ĵus provis
sukcese en la atmosfero ;
rokebenaĵon ni disblovis.
Ni montris nevenkeblan forton.
Skuiĝis nia tuta ter’ !"
„Disblovis vi malsanon, morton !
Falas sterilo kaj kancer’ !"
„Ni estas nun pli altprestiĝaj."
„Aktiva jod’ cent tridek-unu !
Infanaj glandoj malfeliĉaj !"
„Ni estas grandaj." „Dio punu !"
„Nun plialtiĝas la impostoj."
„La malamik’ nin timos pli."
„Stroncio naŭdek en la ostoj . . . ."
„Kie sur ter’ nin ŝirmu ni ?"
„Blindajn infanojn vi lotumas."
„Neniu povos nin kontraŭi."
„Jam leŭkemio min konsumas."
„Ĉu morgaŭ povos nun morgaŭi ?"
„Ankaŭ cezi’ cent tridek sep.
„Kian infanon nun mi naskos ?"
„Kio okazos al la nep’
Se kromosomoj mem fiaskos ?"
„Ni fortan pozicion ĝuas."
„Ni sentas naŭzon, grandan lacon."
„La homajn genojn mem vi skuas."
„Per bomboj ni certigas pacon !"
„Ni pezos en la konferenco."
„La lakto estos venenita."
„Plej glora estas la potenco."
„Ve al kruelo hipokrita !"
„Kancero, blanka sango, mortoj
aĉegaj, venenad’ aera,
kaj idiotoj kaj abortoj,
kaj misformiĝo enutera,
en mond’ de malbenitaj amoj -
krioj de geamantoj altu -
monstroj, cikatroj, ĝiboj, skvamoj,
sepso, nekrozo : haltu, haltu !"
el Sennaciulo, januaro 1962}
Sennacieca Asocio Tutmonda (SAT)
67 av. Gambetta
FR - 75020 Paris
Retadreso : kontakto_ĉe_satesperanto.org
Pri financaĵoj : financoj_ĉe_satesperanto.org
Retejo : http://satesperanto.org/
Tel : (+33) 09 53 50 99 58
Poŝtkonto n-ro 1234-22 K, La Banque Postale, Paris
IBAN : FR41 2004 1000 0101 2342 2K02 064
BIC : PSSTFRPPPAR
Konto de SAT ĉe UEA : satx-s
Konto de SAT ĉe PayPal : financoj_ĉe_satesperanto.org
Por renkontiĝi kun SAT-anoj en Parizo, informiĝu ĉe la sidejo de SAT-Amikaro
Se vi havas demandojn pri SAT, skribu al la SAT-oficejo en Parizo
aŭ al via peranto
Pri teknikaj problemoj sur la paĝo, skribu al paĝo-aranĝulo.