SAT - Sennacieca Asocio Tutmonda

Raporto pri la kunsido de la Liberecana Frakcio dum la Kongreso en Jalto (2012)

Kani — 2016-09-24T21:34:00Z

La 15an de aŭgusto 2012 okazis la kunsido de la Liberecana Frakcio de SAT en Jalto, Ukrainujo. Ĝin partoprenis dekunu SAT-anoj : Karmela Cidoncha, Andreo Hoaro, An-Mari' Leprevost, Flora Markovo, Vito Markovo, Vladimir Minin', Rafaelo Mateos González, Nikolao Gudskov, Marcelo Redoulez, José Salguero Rodríguez (Kani) kaj Pierre Soubourou (Ŝtonĉjo).

K-do Kani unue klarigis la celojn de la LF, t.e. 1) informi pri kaj varbi al Esperanto en liberecanaj medioj 2) interŝanĝi informojn kaj konsilojn por kiel eble plej efike agadi tiucele. Li poste priskribis la ĝeneralan funkciadon de la frakcio. La ĉefaj komunikiloj de la frakcio nuntempe estas la dissendolisto kaj la retpaĝo.

Oni poste parolis pri la Internaciaj renkontiĝoj anarĥiismaj, kiuj okazis en Sankta-Imjero (france Saint-Imier), Svisujo, de la 8a ĝis la 12a de aŭgusto 2012. Pluraj anoj de la LF partoprenis tiujn renkontiĝojn. Ili ties disdonis flugfoliojn kaj dum kunveno parolis pri Esperanto, SAT kaj la LF. Almenaŭ deko da ĉeestantoj ekinteresiĝis pri la temo kaj diskutis kun LF-anoj. La flugfolioj disdonitaj estas plurlingvaj : krom la originala teksto en Esperanto, aperis tradukoj en la angla, la franca, la germana, la hispana, la itala, la kroata kaj la rusa.

La situacion en anarĥiistaj medioj rilate al Esperanto oni poste pridiskutis. En Hispanujo, diris k-doj Kani kaj Rafaelo, la sinteno de la ĉefaj liberecanaj sindikatoj (NKL kaj ĜKL) estas relative favoraj al Esperanto. Plie, la universitatnivelaj revuoj liberecanaj Germinal kaj Estudios aperigas resumon en Esperanto por ĉiu artikolo. Kvankam relative ofte favoraj al Esperanto, tamen multaj sindikatanoj ne havas sufiĉe da tempo por lerni aŭ utiligi ĝin.

K-do Redoulez, ano de la franca fervojista sindikato klasbatala SUD-Rail, diris, ke en ĉi tiu sindikato agadas relative multaj anarĥiistoj. Tamen, tiel same, kiel en Hispanujo, ili diras, ke ili ne havas sufiĉe da tempo por lerni Esperanton, kvankam ili agnoskas ties utilecon.

K-do Hoaro anoncis, ke en Montpeliero (Sudfrancujo), liberecana asocio, kiu nomiĝas “Centre Ascaso-Durruti” kaj kadre de kiu interalie okazas debatoj kaj prelegoj, pretas disponigi sian lokon por Esperanto-kursoj. Tamen, ĝis nun, neniu Montpelierano sin proponis por gvidi kurson en tiu loko. Kvankam li ne ankoraŭ sentas sin preta, tamen K-do Hoaro pli kaj pli intencas kapti tiun bonan okazon kaj sin proponi.

Finfine oni alvokis al partoprenado en la venonta SAT-kongreso, kiu okazos en Madrido, Hispanujo. Tie, ni LF-anoj, certe profitos la okazon renkontiĝi kun liberecanaj sindikatanoj kaj agademuloj.

Por la Liberecana Frakcio de SAT, Andreo Hoaro

Sennaciulo, Septembro-Oktobro 2012, n-ro 09-10 (1287-1288) paĝo 31

Raporto pri la kunsido de la Liberecana Frakcio dum la Kongreso en Kazanlak (2008)

Kani — 2016-09-20T21:34:00Z

Ĉeestas 14 kunsidanoj.

Oni konstatas, ke kvankam pasintjare okazis vigla kunsido de la LF dum la pariza kongreso, kaj oni decidis tiam reaperigi la bultenon Liberecana Ligilo, nek okazis tio nek la LF funkciis dum la jaro por io ajn. La LL ricevis ununuran artikolon kaj neniu sendis mesaĝojn al la grupo. Nur oni publikis artikolon en S'ulo pri la pariza kunsido.

La unua decido laŭ la statuto de SAT estas aprobi la regularon. Pri tiu oni konstatas, ke denove dissendolisto estos la ligilo inter la frakcianoj. Ĝis nova estos malfermita, “respondo al ĉiuj” estos la sistemo atingi ĉiujn frakcianojn. Tiun protokolon oni sendos al la frakcianoj, kiuj lasis sian retadreson ĉu ĉi-jare ĉu pasintjare. Oni konstatis, ke nek funkciis prezidanto dum la jaro kaj pro tio neniu petis al la kongresorganizantoj salonon kaj horon por la kunsido nek iu sentis sin kun rajto prezidi tiun ĉi kunsidon. Fakte Kani prezidas ĝin, redaktos la protokolon kaj kun Jakvo petos al la organizontoj de la venonta kongreso de Milano salonon kaj horon por kunsidi.

Oni konstatas, ke fakte okazas agado inter anarkiistoj kaj E-o sed la LF ne estis en tiuj aferoj. En Hispanio okazis kursoj en lokaj sindikatoj de CNT ne nur por sindikatanoj : pri la rezulto de la kurso oni nenion scias. Iu membro de CGT agadas ene de SATeH, sed neniel kontaktis kun la LF. Vinko petas ligojn kaj kontaktojn por sia agado.

Pri LL oni vidas la taŭgecon reaperigi ĝin. Nun restas iom da mono sufiĉe por aperigi LL (du numeroj antaŭ la venonta kongreso estos sufiĉaj) kaj pro tio ĉi-jare oni ne kolektis monon. Oni devas uzi la sendon de artikoloj al S'ulo por revigligi la frakcion kaj pli detalajn aŭ batalemajn al LL. Ambaŭ ili taŭgas. Ekzemple oni debatis pri la taŭgeco verki artikolon pri la centjariĝo de la liberecana sindikato hispana CNT okazonta en 2010 ; tiu povas aperi resume en S'ulo, pli detale en LL aŭ eventuale en broŝuro.

Kani (35501)

Sennaciulo, septembro-oktobro 2008, n-ro 9-10 (1239-40) paĝo 19

Raporto pri la kunsidoj de la Liberecana Frakcio en Antony, Francujo, 2007

Kani — 2016-09-19T21:35:00Z

La (80a S.A.T.-kongreso okazinta en Antony (12 km. sude de Parizo) de la 21a ĝis la 28a de julio 2007) donis motivojn de vera kontentiĝo. Paradokse, la bedaŭrinde malgranda nombro de partoprenantoj, estis inverse proporcia al la intensa aktivado, kiu svarmis dum tiuj kongresaj tagoj.

En tiu kadro kunvenis la Liberecana Frakcio de S.A.T. du fojojn :

1) Marde la 24an de julio de la 17h45 ĝis la 18h45 : ĉeestis 8 gekamaradoj (aliaj estis okupitaj pri diversaj kongresaj taskoj). Post kelkaj amikaj parolvortoj rilate niajn fidelajn membrojn kiuj pro malsano kaj maljuniĝo ne plu povas partopreni niajn kongresojn, oni pritraktis la temon pri reapero de la bulteno Liberecana Ligilo. K-do J. Schram diris sian pretecon roli kiel redaktanto de la bulteno, esperante ke oni liveros al li la necesan materialon por plenumi tiun taskon.

K-doj G. Cavalier kaj H. Peyrouty preparis komunikon kiu tekstas jene :

Post 25 jaroj da ekzisto, ni informas la legantojn, ke la elsendo de Radio Esperanto nuntempe aŭskulteblas per la reto : federation-anarchiste.org (per ADSL, per modemo). Eblas reaŭskulti la elsendojn dum unu semajno. Radio Esperanto, en la kadro de Liberecana Radio elsendas ĉiujn vendredojn de la 17h30 ĝis la 19h00 (Radio Libertaire 89,4 MHz, Parizo)

Raportis pri tiu kunveno : k-do H. Peyrouty.

2) Ĵaŭde la 26an de julio de la 16h30 ĝis la 17h30 : kuniĝis 16 gekamaradoj.

Denove oni parolas pri dezirinda reaperigo de Liberecana Ligilo. Se la materialo regule alvenas ĉe la redaktanto, la revuo povos aperi du aŭ tri fojojn jare. Necesos trovi kompetentulo(j)n por zorgi pro la korektado de la tekstoj. Jam iu sin proponas por sendi artikolojn kaj eventuale korekti aŭ trovi korektantojn. La farado kaj sendo de la revuo starigos elspezojn, tial la ĉeestantoj deziras nutri la kason de la frakcio per kolektado de iom da mono. Oni kolektas 170 eŭrojn kiuj aldoniĝos al la nuna ekzistanta sumo en la kaso pri kiu respondecas k-do J. Schram.

Sekvas interesaj demandoj, ĉefe faritaj de junaj homoj. Ili deziras plu scii pri la ideoj kaj celoj de la liberecanoj... sed jam unu horo pasis... la salono estas bezonata por kunveno de alia frakcio.

Oni disiĝas kun la espero de venonta efika kunlaborado.

Revigliĝas la Liberecana Frakcio de S.A.T.

J. Ternant

Sennaciulo, julio-aŭgusto 2007, n-ro 7-8 (1225-6) paĝo 107