Ĝisdatigita merkredon la 6an de julio 2016   Privata spaco  
Kiuj ni estas ? Kio estas SAT ? Eldonaĵoj E-librejo Projektoj Regularo Arĥivoj Kontaktoj

En la sama rubriko

puce SAT-EFK ekproduktas dokument-filmon pri Esperanto
puce Agad-raporto por la periodo de junio 2010 ĝis majo 2011
puce Konsisto de SAT-EFK (2011-2012)
> Hejmpaĝo > Arĥivoj > SAT-EFK ekproduktas dokument-filmon pri Esperanto

Klaku por vidi grandan formaton

SAT-EFK ekproduktas dokument-filmon pri Esperanto

Aprilo 2010

La eldona fako kooperativa de SAT (SAT-EFK) ekigis ambician projekton : temas pri la produktado de profesia dokument-filmo pri la esperantista movado. La laboro komenciĝis antaŭ pli ol unu jaro kaj jam pluraj ŝtupoj estis trapasitaj : ricevo de prunto de SAT-Amikaro (50 000€), dungo de reĝisoro, starigo de buĝeto kaj de scenaro por la filmo.

Pri ĉi tiu projekto nia labormetodo estas jena : ni estas produktantoj. La filmon aŭtoros la reĝisoro, Dominiko Gaŭtiero (Dominique Gautier). La filmo do transdonos lian vidpunkton pri nia movado, kiun li malkovras dum la filmado. Ni ne celas produkti memreklaman aŭ propagandan filmon. Laŭ ni tio estas la ĉefa kondiĉo, por ke ĝi ricevu veran eĥon antaŭ la publiko.

Por konstrui la scenaron, aldone al multaj interŝanĝoj, ni jam ekigis la filmadon por ke la reĝisoro konatiĝu kun la esperanta movado. Li tiel vizitis Vinilkosmon por ĉeesti la registradon de la "Afrika Kompilo", kaj profitis pri la franca turneo de HORI Jasuo por pridemandi lin. Li krome pasigis semajnon en Bialistoko kun sia kameraisto, akompanate de Christophe Chazarein, eŭropa volontulo kiu laboris por la Universala Kongreso. Tie li renkontis kaj pridemandis la esperantistojn de la naskiĝ-urbo de L.L. Zamenhof.

Dominiko Gaŭtiero naskiĝis en Bordozo en 1953. Li jam realigis multajn dokument-filmojn, ankaŭ kunlabore kun asocioj, kio por ni estas aparte grava.Fine, Dominiko Gaŭtiero ĉeestis la SAT-Amikaran kongreson en Hiliono, kiu kunigis pli ol 230 partoprenantojn. Li tie multe filmis kaj pridemandis.

Vi povas konstati, laŭ la amplekso de la buĝeto kaj laŭ la unuaj paŝoj de la filmado, ke ni uzas la necesajn rimedojn por realigi la filmon, pri kiuj revas la esperantistoj por prezenti nian movadon.

Ni jam komencis pretigi la liston pri la venontaj filmad-lokoj. Ni kontaktos la asociojn koncernatajn de la filmado por peti ilian helpon kaj bonan akcepton de la filmistoj.

Sed samtempe ni devas pensi pri la diskonigo de la filmo.

Ni deziras filmon en kiel eble plej multaj lingvoj, kio estas la ĉefa kondiĉo por vasta diskonigo. Unuflanke ni deziras aŭdajn versiojn por la 6 laborlingvoj de UNO plus, evidente, esperanto. Ni financos la registradon de la sonbendoj. Temos pri profesia laboro kun entrepreno, kiu dungos aktorojn por ĉiu lingvo.

Aliaj lingvoj povas kaj devas esti aldonitaj pere de subtitoloj. Aŭda versio estas antaŭvidebla por aldonaj lingvoj se la koncernataj asocioj trovos la necesan monon.

Konkrete, ni bezonos helpon por la tradukoj. Ni petos de ĉiu asocio, kiu deziros subtitolojn en sia lingvo, ke ĝi indiku al ni la kontakt-adreson de respondeculo pri la traduko. La tradukenda dosiero devus esti havebla ĉirkaŭ novembro 2010. La pretigo de la subtitoloj havas koston. Por elteni ĝin ni petas, ke la asocioj bonvolu antaŭmendi (kaj antaŭpagi) minimume 50 DVD-ojn je libroserva prezo (12,50€ + sendokostoj). Kompreneble eblas mendi pli multajn diskojn por helpi al la financado de la filmo.

Ni celas filmon, kiu trafos vastan publikon. Gravos do, ke la filmo estu ĉie diskonigita. Tial aldone al la publika vendoprezo de 18€, eldono entenanta la dissendorajton por publikaj senpagaj projekciadoj aŭ senpagaj pruntoj estos havebla kontraŭ 40 €. Tio devus ebligi al ĉiu loka klubo organizi tute laŭleĝe projekciadon aŭ ebligi la aĉetadon de la filmo por bibliotekoj, kiuj pruntedonos ĝin.

La filmo ankaŭ ekzistos en profesia formato ebliganta montradon kun granda ekrano. Kineja projekciado do eblos. La reĝisoro povos ĉeesti dum la projekciado. Por tiutipa formato bonvolu rekte rilati kun la kooperativo SAT-EFK por difini la prezon.

Ni ankaŭ petas vian helpon por esplori en via lando, ĉu la filmo povus havi lokon en iuj naciaj dokumentfilmaj festivaloj. Por la lingvoregionoj, por kiuj ni disponos pri aŭda versio, ni povos antaŭvidi partoprenon en ĉi tiuj festivaloj : tio estos okazo por konigi la filmon kaj esperanton.

Fine, ĉi tiu festivala diskonigo ebligus konatigi la filmon al respondeculoj pri televidaj programoj. Naciaj kaj regionaj asocioj povus ankaŭ rekte kontakti televidkanalojn por ke ili elsendu la filmon. En tiaj kazoj necesos serioze interrilati kun la kanaloj kaj subskribi kontrakton. La financaj kondiĉoj estos diskutendaj laŭ multaj kriterioj. La mono kolektita en tiu ĉi kadro povus esti dispartigita inter la asocio, kiu trovis la televid-kanalon, kaj la kooperativo SAT-EFK.

Speciala retejo estas starigita por informi pri la projekto, ĉe la adreso http://esperantofilmo.com.

 

Eldona Fako Kooperativa de SAT /// 67 av. Gambetta /// 75020 PARIS

En Francio : Poŝtkonto : Eldona Fako Kooperativa de SAT n°PA 57 612 61W

El eksterlando : Sama konto : IBAN : FR79 2004 1000 0157 6126 1W02 054 BIC : PSSTFRPPPAR aŭ al la kooperativa konto ĉe UEA : efak-q


Kreita per spip